“Fiziki fəallıqla skaut ruhunu kəşf et” layihəsinin təlimləri keçirilib

Tural Tural
Jan 10, 2026 - 22:52 Updated: Jan 24, 2026 - 22:52
0 8
“Fiziki fəallıqla skaut ruhunu kəşf et” layihəsinin təlimləri keçirilib

Şamaxı şəhər M.K.Veyisov adına 6 nömrəli tam orta ümumtəhsil məktəbində “Fiziki fəallıqla skaut ruhunu kəşf et” adlı layihəsinin təlimləri keçirilib.

Təlimlər İntiqam Rzayev tərəfindən aparılıb. Təlimlərin əsas məqsədi skaut metodlarına əsaslanan liderləri yetişdirməklə, onlara peşəkar skaut (həyati) bilik və bacarıqlarını öyrətməklə onların vasitəsilə şagirdlərin sağlam həyat tərzi keçirmələrinə, zərərli vərdişlərdən qorunmalarına, boş vaxtlarının səmərəli keçirmələrinə dəstək verməkdən ibarət olub. Təlimlərdən öncə Azərbaycan Skautlar Assosiasiyası İctimai Birliyinin peşəkar təlimçi-ekspertləri tərəfindən “Skaut metodları ilə qeyri-formal təhsilin təşkili” proqramı tərtib olunub. Təlimlər 3 gün ərzində təşkil olunub və ümumilikdə 12 nəfər müəllim iştirak edib. Onlar təlimlərdən sonra öz məktəblərində 5-6-cı sinif şagirdlərindən ibarət 20 nəfərlik skaut dəstəsi formalaşdıracaqlar. Bunun üçün onlar şagirdlər və valideynlər üçün skaut metodlarına əsaslanan görüşlər və fəaliyyətlər təşkil edəcəklər. Bunun üçün onlar hazır proqramla təmin olunacaqlar.

Qeyd edək ki, layihənin məqsədi şagirdlərin həyati bilik və bacarıqlarını inkişaf etdirmək, sosiallaşmalarını və komandada işləmə bacarıqlarını artırmaq, sağlam həyat tərzinə maraq yaratmaq, liderlik və özünüifadə keyfiyyətlərini gücləndirməkdir. Xatırladaq ki, layihə Təhsildə İnkişaf və İnnovasiyalar üzrə IX qrant müsabiqəsində qalib olub və Şamaxı şəhər M.K.Veyisov adına 6 nömrəli tam orta ümumtəhsil məktəbində icra edilir.